ԱՄՆ արդարադատության նախարարությունը նոր փաստաթղթեր կհրապարակի էփշտեյնի գործով

ԱՄՆ Արդարադատության նախարարությունը տեղեկացվել է Ջեֆրի Էփշտեյնի գործին հնարավոր առնչվող նոր փաստաթղթերի հայտնաբերման մասին։ Ըստ գերատեսչության՝ Նյու Յորք նահանգի հարավային շրջանի դատախազությունն ու Դաշնային հետաքննությունների բյուրոն (ՀԴԲ) հայտնաբերել են ավելի քան մեկ միլիոն փաստաթուղթ, որոնք կարող են կապ ունենալ քրեական գործի հետ։

Արդարադատության նախարարությունում հայտնել են, որ փաստաթղթերի ծավալը զգալի է, և դրանց մանրամասն ուսումնասիրությունն արդեն մեկնարկել է։ Գործընթացում ներգրավված իրավաբանները փաստաթղթերը ստուգում են շուրջօրյա ռեժիմով՝ պարզելու դրանց բովանդակությունն ու հնարավոր նշանակությունը գործի շրջանակում։

Նշվում է, որ փաստաթղթերի նախապատրաստման ընթացքում կատարվում են նաև օրենքով նախատեսված խմբագրումներ։ Դրանք ուղղված են Էփշտեյնի գործողություններից տուժած անձանց անձնական տվյալների և անվտանգության պաշտպանությանը՝ մինչև նյութերի հանրայնացումը։

Արդարադատության նախարարության փոխանցմամբ՝ ստուգման և անհրաժեշտ փոփոխությունների ավարտից հետո փաստաթղթերը կհրապարակվեն հնարավորինս սեղմ ժամկետներում՝ օրենքի պահանջներին համապատասխան։