Թեհրանի կողմից ուրանի հարստացումն անթույլատրելի է․ ԱՄՆ դեսպան

Միացյալ Նահանգները պատրաստ է Իրանի հետ անցկացնել բանակցություններ Թեհրանի միջուկային ծրագրի շուրջ, եթե Իսլամական Հանրապետությունը պատրաստ լինի ուղիղ երկխոսության։ Այս մասին հայտնել է ԱՄՆ-ի Մերձավոր Արևելքի հարցերով հատուկ բանագնացի տեղակալ Մորգան Օրտագուսը։

«Միացյալ Նահանգները կշարունակի պատրաստակամ մնալ բանակցությունների անցկացմանը, սակայն միայն այն դեպքում, եթե Թեհրանը բաց լինի ուղիղ և բովանդակալից երկխոսության համար», - ասել է նա ՄԱԿ-ի Անվտանգության խորհրդի նիստում։

Օրտագուսը միաժամանակ նշել է, որ ԱՄՆ-ն մտադիր չէ բանակցություններ վարել հրապարակային ձևաչափով։ Նա նաև ընդգծել է, որ Վաշինգտոնը շարունակում է հավատարիմ մնալ այն դիրքորոշմանը, ըստ որի Թեհրանի կողմից ուրանի հարստացումը անթույլատրելի է։

Նշվում է՝ Իրանի և ԱՄՆ-ի միջև միջուկային խնդրի շուրջ անցկացված բանակցությունների հինգ փուլերը՝ Օմանի միջնորդությամբ, ավարտվել են առանց արդյունքի՝ Իսրայելի կողմից Իսլամական Հանրապետության դեմ ռազմական գործողության մեկնարկի և Իրանի միջուկային օբյեկտներին ամերիկյան զինված ուժերի հարվածների պատճառով։