Ռուսաստանը՝ WhatsApp հավելվածի վերջնական փակման մասին

WhatsApp մեսենջերը կարող է ամբողջությամբ արգելափակվել Ռուսաստանի տարածքում՝ գործող օրենսդրության պահանջների չկատարման պատճառով։ Այդ մասին հայտարարել է ՌԴ թվային զարգացման նախարարությանը կից Հասարակական խորհրդի անդամ, Հանրային պալատի կրթության և դաստիարակության հանձնաժողովի առաջին փոխնախագահ Արմեն Գասպարյանը։

Նրա խոսքով՝ եթե Meta ընկերության ղեկավարությունը շահագրգռված է ռուսական շուկայում ներկայություն պահպանելու հարցում, ապա պարտավոր է հետևել Ռուսաստանի Դաշնության օրենսդրական նորմերին։ Սակայն, ինչպես նշել է Գասպարյանը, ներկայումս այդ պահանջների կատարումը չի նկատվում։

«Դա մեզ բերում է այն եզրակացության, որ մեսենջերը կարող է արգելափակվել հենց օրենսդրության պահանջների հիման վրա»,- ընդգծել է նա։

Ավելի վաղ Պետդումայի տեղեկատվական քաղաքականության, տեղեկատվական տեխնոլոգիաների և կապի հանձնաժողովի նախագահ Սերգեյ Բոյարսկին նույնպես հայտարարել էր, որ WhatsApp-ի բնականոն գործունեության հեռանկարները Ռուսաստանում գնահատվում են շատ ցածր։