Ադրբեջանում ձերբակալված Վագիֆ Խաչատրյանը հոսպիտալացվել է
Ադրբեջանում ձերբակալված Վագիֆ Խաչատրյանը հոսպիտալացվել է։ Այս մասին հայտնում է Ադրբեջանի Արդարադատության նախարարությունը։
«70-ամյա դատապարտյալ Վագիֆ Խաչատրյանի առողջական վիճակը վատթարացել է, նրա մոտ առաջացել են շնչառության դժվարացում և սրտի ցավեր։ Նա առաջին բուժօգնություն է ստացել Արդարադատության նախարարության գլխավոր բժշկական վարչության բուժմասում, որից հետո շտապ տեղափոխվել է Արդարադատության նախարարության բժշկական հաստատություն։ Այնտեղ իրականացվել է ինտենսիվ թերապիա և վերակենդանացում, սակայն քանի որ նրա վիճակի էական բարելավում չի նկատվել, նա տեղափոխվել է համապատասխան պետական բժշկական հաստատություն՝ բարձրակարգ բժշկական օգնություն ստանալու համար։ Այս պահին նրա վիճակը գնահատվում է ծանր, ինտենսիվ թերապիան շարունակվում է»,- հայտնում են Ադրբեջանի Արդարադատության նախարարությունից։
Հիշեցնենք՝ 2023 թվականի հուլիսին Հակարիի կամրջից ադրբեջանական կողմն առևանգել էր նաև Արցախի Հանրապետության քաղաքացի Վագիֆ Խաչատրյանին։ Նա Կարմիր խաչի միջոցով Երևան էր գալիս սրտի վիրահատության նպատակով՝ աղջկա ուղեկցությամբ։
Հավելենք՝ այս տարվա սեպտեմբերի 3-ից Բաքվում այլևս չի գործում Կարմիր խաչի միջազգային կազմակերպության գրասենյակը, այն Բաքվում փակվել է իշխանությունների պահանջով։ Արդյունքում Բաքվում ապօրինի պահվող հայ գերիները, պատանդները զրկվել են իրենց ընտանիքների հետ կապ հաստատելու միակ միջոցից, սակայն ավելի վաղ հայտնել էինք, որ օրերս ընտանիքի անդամների հետ կապ է հաստատել Բաքվում 15 տարվա ազատազրկման դատապարտված Վագիֆ Խաչատրյանը։
