Մակրոնն աջակցել է Գրենլանդիային՝ Թրամփի կողմից կղզու հարցով հատուկ բանագնացի նշանակման ֆոնին
Ֆրանսիայի նախագահ Էմանուել Մակրոնը աջակցություն է հայտնել Գրենլանդիային և Դանիային՝ կղզում ԱՄՆ-ի կողմից հատուկ դեսպան նշանակելուց հետո։
«Նուուկում ես վերահաստատեցի Ֆրանսիայի անփոփոխ աջակցությունը Դանիայի և Գրենլանդիայի ինքնիշխանությանն ու տարածքային ամբողջականությանը։ Գրենլանդիան պատկանում է իր ժողովրդին։ Դանիան հանդես է գալիս որպես դրա երաշխավոր։ Ես միանում եմ եվրոպացիներին՝ հայտնելով մեր լիակատար համերաշխությունը», - գրել է Մակրոնը X սոցիալական ցանցի իր էջում։
Հիշեցնենք՝ ԱՄՆ նախագահ Դոնալդ Թրամփը երկուշաբթի օրը հայտարարել է Լուիզիանա նահանգի նահանգապետ Ջեֆ Լենդրիին Գրենլանդիայի հարցերով հատուկ բանագնաց նշանակելու մասին։
Ավելի ուշ նահանգապետը հաստատել է Միացյալ Նահանգների մտադրությունը՝ կղզին դարձնել իր մասը։ Դանիայի արտգործնախարար Լարս Լյոկե Ռասմուսենը երկուշաբթի ընդգծել է, որ ծայրաստիճան վրդովված է ԱՄՆ նոր հատուկ բանագնացի հայտարարություններից, ինչի կապակցությամբ Կոպենհագենում ԱՄՆ դեսպանին կկանչի նախարարություն և բացատրություններ կպահանջի։
Դանիայի և Գրենլանդիայի վարչապետներ Մետե Ֆրեդերիկսենը և Յենս-Ֆրեդերիկ Նիլսենը համատեղ հայտարարությամբ զգուշացրել են Ամերիկային կղզին զավթելու փորձերից՝ նշելով, որ հարգանք են ակնկալում իրենց ընդհանուր տարածքային ամբողջականության նկատմամբ։
