Կարևոր է Կիևին աջակցությունը և պաշտպանական ծախսերի ավելացումը․ Ռյուտե

ՆԱՏՕ-ի գլխավոր քարտուղար Մարկ Ռյուտեն կոչ է արել շարունակել աջակցությունն Ուկրաինային՝ զգուշացնելով, որ Եվրոպան կբախվի անվտանգության աճող ռիսկերի, եթե նրա վճռականությունը տատանվի։ Այս մասին նա ասել է գերմանական DPA գործակալությանը տված հարցազրույցում։

Ռյուտեն նշել է, որ ՌԴ նախագահ Վլադիմիր Պուտինի կողմից ՆԱՏՕ-ի անդամի վրա հարձակման փորձը կանխելու համար Ուկրաինան պետք է ուժեղ լինի։ Նա նաև ընդգծել է, որ ՆԱՏՕ-ի անդամները պետք է ավելացնեն պաշտպանական ծախսերը՝ համաձայն հունիսին Հաագայում դաշինքի գագաթնաժողովում ձեռք բերված պարտավորությունների։

«Եթե մենք անենք այդ երկու բանը, ապա բավականաչափ ուժեղ կլինենք պաշտպանվելու համար, և Պուտինը երբեք չի փորձի», - ասել է Ռյուտեն՝ անդրադառնալով դաշինքի վրա Ռուսաստանի հնարավոր հարձակմանը։Դաշինքի ղեկավարը հավելել է, որ վերազինումը պետք է արագ տեղի ունենա։

Նրա խոսքով՝ հետախուզական գնահատականներից կախված՝ անվտանգության իրավիճակը կարող է վտանգավոր դառնալ արդեն 2027 թվականին։Ռյուտեն Ռուսաստանի ռազմական ծախսերը մատնանշել է որպես Պուտինի ներկայացրած սպառնալիքի ապացույց՝ ասելով, որ Մոսկվան այժմ իր պետական ​​բյուջեի ավելի քան 40%-ը հատկացնում է պաշտպանությանը։

Ըստ ՆԱՏՕ-ի ղեկավարի՝ Ուկրաինայում պատերազմը ցույց է տվել Պուտինի պատրաստակամությունը՝ ընդունելու ծանր կորուստները։ Ռյուտեն նաև մեջբերել է գնահատականներ, որոնց համաձայն՝ մոտ 1,1 միլիոն ռուսաստանցի զինվոր է սպանվել կամ վիրավորվել։