Ադրբեջանում ցամաքային սահմանները չեն բացվի

Ադրբեջանը կրկին երկարաձգել է ցամաքային սահմաններին սահմանված կարանտինը, որը գործում էր դեռևս կորոնավիրուսի ժամանակ։ Այս անգամ սահմանափակումների գործողությունը երկարաձգվել է մինչև 2026 թվականի ապրիլի 1-ը։

«Որոշումը կայացվել է «երկրում կորոնավիրուսային վարակի (COVID-19) տարածումը և դրա հնարավոր հետևանքները կանխելու համար», - ասվում է որոշման մեջ։

Սահմանների փակ մնալը նշանակում է, որ Բաքու-Թբիլիսի երկաթուղային հաղորդակցության վերագործարկումը կրկին հետաձգվում է։

Արդեն հինգ տարի է, ինչ Վրաստանից հարևան Ադրբեջան հնարավոր է հասնել միայն օդային ճանապարհով, քանի որ ցամաքային սահմանը բաց է միայն բեռնափոխադրումների համար։

«Այն փաստը, որ մեր ցամաքային սահմանները վերջին տարիներին փակ են մնացել, մեզ փրկել է շատ լուրջ աղետներից։ Նույնիսկ այսօր, երբ սահմանները փակ են մնում, ձեռնարկվում են վտանգավոր գործողություններ, և դրանք դադարեցվում են։ Հետևաբար, սահմանային անվտանգությունը կպաշտպանի մեզ արտաքին ռիսկերից», - ասել էր Ադրբեջանի նախագահ Իլհամ Ալիևը։

Ադրբեջանն այժմ աշխարհում միակ երկիրն է, որի ցամաքային սահմանները չեն բացվել։