Սա երկարաժամկետ ռազմավարություն է՝ ուղղված հզոր տարածաշրջանի ստեղծմանը․ Իրանի նախագահ

Իրանի Իսլամական Հանրապետության նախագահ Մասուդ Փեզեշքիանը Եվրասիական տնտեսական միության (ԵԱՏՄ) Բարձրագույն խորհրդին հղած ուղերձում հայտարարել է, որ Իրանի և միավորման անդամ երկրների միջև համագործակցությունը երկարաժամկետ ռազմավարություն է՝ ուղղված հզոր տարածաշրջանի ստեղծմանը։ Այս մասին փոխանցում է IRNA գործակալությունը:

«Իրանի համագործակցությունը ԵԱՏՄ անդամ երկրների հետ երկարաժամկետ ռազմավարություն է, որն ուղղված է հզոր տարածաշրջանի ստեղծմանը՝ ազգային ինքնիշխանությունների ամրապնդման, տրանսպորտային կապերի և առևտրի դյուրացման, էներգետիկ անվտանգության բարձրացման, տեխնոլոգիաների զարգացման, ինչպես նաև համատեղ ֆինանսական և բանկային ենթակառուցվածքների ստեղծման ու ժողովուրդների միջև շփումների ընդլայնման», - ասվում է Փեզեշքիանի հայտարարության մեջ։

Նա ընդգծել է, որ ապագան պատկանում է այն ժողովուրդներին, որոնք առաջընթացի ուղին հարթում են համագործակցության և փոխադարձ վստահության միջոցով։ Հիշեցնենք, որ ԵԱՏՄ գագաթնաժողովին մասնակցել են ԵԱՏՄ անդամ պետությունների ղեկավարները՝ Հայաստանի վարչապետը, Ռուսաստանի, Բելառուսի, Ղազախստանի, Ղրղզստանի նախագահները: