Մարկո Ռյուտեն՝ Ուկրաինա զորքեր ուղարկելու պատրաստակամության մասին
ՆԱՏՕ-ի գլխավոր քարտուղար Մարկո Ռյուտեն հայտարարել է Եվրոպայի պատրաստակամության մասին զորքեր ուղարկել Ուկրաինա «Ռուսաստանի կողմից խաղաղության պայմանագիրը խախտելու» դեպքում։ Այս հայտարարությունը նա արել է Bild-ին տված հարցազրույցում։
«Իհարկե, այս պահին մենք հրապարակայնորեն մանրամասներ չենք քննարկում։ Սակայն կարող եմ ասել, որ մի քանի եվրոպական երկրներ հայտնել են անհրաժեշտության դեպքում զորքեր տրամադրելու պատրաստակամության մասին», – նշել է Ռյուտեն։
Նա հավելել է, որ ներկայումս աշխատանքներ են իրականացվում «կամավորների կոալիցիայի» ճշգրիտ կառուցվածքը հստակեցնելու ուղղությամբ։
Ռուսաստանի արտաքին գործերի նախարարությունը բազմիցս հայտարարել է, որ Ուկրաինայում ՆԱՏՕ-ի զորքերի տեղակայման հետ կապված ցանկացած սցենար Մոսկվայի համար կտրականապես անընդունելի է և կարող է հանգեցնել կտրուկ սրման։ Ռուսաստանը բազմիցս նշել է, որ Ուկրաինայի զինված ուժերը կարող են օգտագործել հրադադարը՝ իրենց դիրքերը ամրապնդելու նպատակով։
