Ուկրաինայի ԱԳ նախարարը նշել է՝ որ դեպքում Կիևը կվերադարձնի ԵՄ-ի պարտքը

Ուկրաինայի արտաքին գործերի նախարար Անդրեյ Սիբիգան հայտարարել է, որ Եվրոպական միության կողմից Ուկրաինային €90 միլիարդի չափով ֆինանսական աջակցություն տրամադրելու որոշման կայացման գործում առանցքային դեր են ունեցել Եվրահանձնաժողովի նախագահ Ուրսուլա ֆոն դեր Լայենը, Գերմանիայի կանցլեր Ֆրիդրիխ Մերցը և Լեհաստանի վարչապետ Դոնալդ Տուսկը։

Սիբիգայի խոսքով՝ նշված ֆինանսական փաթեթը կարևոր նշանակություն ունի երկրի մակրոֆինանսական կայունության պահպանման համար և հնարավորություն կտա ապահովել Ուկրաինայի տնտեսական կայունությունը առաջիկա երկու տարիների ընթացքում։

Նախարարը պարզաբանել է, որ խոսքը վարկային միջոցների մասին է, որոնց վերադարձը պայմանավորված է Ռուսաստանի Դաշնությունից հնարավոր փոխհատուցումների հետ։ Նրա խոսքով՝ սա նվազեցնում է ֆինանսական բեռը Ուկրաինայի համար։

Բացի այդ, Սիբիգան ընդգծել է, որ տրամադրվող վարկը ունի արտոնյալ պայմաններ, ինչը, նրա գնահատմամբ, էական աջակցություն է Ուկրաինայի ֆինանսական համակարգին շարունակվող մարտահրավերների պայմաններում։