Ռուսաստանը Ուկրաինան նվшճելու կամ oկուպացնելու կարողություն չունի. ԱՄՆ հետախուզության տնօրեն

ԱՄՆ Ազգային հետախուզության տնօրեն Թուլսի Գաբարդը X սոցիալական էջում գրել է, որ «խորքային պետության» պատերազմի հրահրողները և նրանց քարոզչական միջոցները կրկին փորձում են խաթարել ԱՄՆ նախագահ Դոնալդ Թրամփի ջանքերը՝ խաղաղություն հաստատելու Ուկրաինայում, և իրականում՝ Եվրոպայում, կեղծ պնդելով, թե «ԱՄՆ հետախուզական համայնքը» համաձայն է և աջակցում է ԵՄ/ՆԱՏՕ-ի այն տեսակետին, ըստ որի Ռուսաստանի նպատակը Եվրոպան ներխուժելն ու նվաճելն է։

«Իրականում ԱՄՆ հետախուզությունը կարծում է, որ Ռուսաստանը նույնիսկ չունի Ուկրաինան նվաճելու և օկուպացնելու կարողություն, առավել ևս՝ «ներխուժելու և օկուպացնելու» Եվրոպան», - նշել է Գաբարդը:

ԱՄՆ Ազգային հետախուզության տնօրենը Reuters-ի կողմից նախկինում տարածված տեղեկատվությունը, անվանել է սուտ։ Նրա խոսքով՝ գործակալության կեղծ պատմությունը նպատակ ունի բնակչության շրջանում հիստերիա և վախ հրահրել, որպեսզի նրանք աջակցեն սրացմանը, ինչի վրա, ըստ նրա, հույս են դնում ՆԱՏՕ-ն և Եվրամիությունը՝ ձգտելով ԱՄՆ զինված ուժերին ներքաշել Ռուսաստանի հետ ուղղակի ռազմական հակամարտության մեջ։

Գաբարդը նշել է, որ իրականում ԱՄՆ հետախուզական համայնքը օրենսդիրներին տեղեկացրել է հետախուզական տվյալների առկայության մասին, որոնք ցույց են տալիս, որ Ռուսաստանը ձգտում է խուսափել ՆԱՏՕ-ի հետ ավելի լայն հակամարտությունից։

Հավելենք՝ Ռուսաստանի նախագահ Վլադիմիր Պուտինը, «Տարվա ամփոփում» համաժողովի ընթացքում մեկնաբանելով արևմտյան քաղաքական գործիչների ագրեսիվ հայտարարությունները, զարմանք է հայտնել ՆԱՏՕ-ի գլխավոր քարտուղար Մարկ Ռյուտեի՝ Ռուսաստանի հետ պատերազմի նախապատրաստման վերաբերյալ մեկնաբանությունների առնչությամբ։ Պուտինը Ռյուտեին խորհուրդ է տվել կարդալ ԱՄՆ Ազգային անվտանգության ռազմավարությունը, որը Ռուսաստանին չի համարում թշնամի։