Մեզ հեշտ հանդիպում չի սպասվում. «Դինամո»-ի գլխավոր մարզիչը «Նոա»-ի դեմ խաղի մասին
Ուկրաինական Կիևի «Դինամո»-ի գլխավոր մարզիչ Իգոր Կոստյուկը Հայաստանի չեմպիոն «Նոա»-ի խաղն ուսումնասիրել է ու գիտի, թե ինչ է ասելու իր խաղացողներին Կոնֆերենցիաների լիգայի հիմնական փուլի վերջին տուրի խաղից առաջ, որում Կիևի ակումբը մրցելու է հենց Հայաստանի չեմպիոնի հետ:
«Անելու ենք ամեն ինչ, որ մրցակցի հարձակվողները չհաջողեն մեր դեմ խաղում: Ուսումնասիրել ենք «Նոա»-ին ու գիտենք, որ մեզ հեշտ հանդիպում չի սպասվում: Սակայն հիմա ոչինչ չեմ ասի մրցակցի թիմի առավելությունների կամ թույլ կողմերի մասին: Կխոսեմ միայն իմ ֆուտբոլիստների հետ»,- լեհական Լյուբլին քաղաքում կայացած նախախաղային մամուլի ասուլիսի ժամանակ ասել է Իգոր Կոստյուկը:
«Դինամո»-ի ֆուտբոլիստ Միկոլա Միխայլենկոյի կարծիքով` «Նոա»-ն ուժեղ թիմ է: «Գիտենք, որ «Նոա»-ն լավ թիմ է, որն ունի հրաշալի ֆուտբոլիստներ: Մեզ հեշտ հանդիպում չի սպասվում»,- շեշտել է նա:
«Դինամո»-ն մի շարք կորուստներով է մոտենում առաջիկա խաղին:Ֆուտբոլի Կոնֆերենցիաների լիգայի հիմնական փուլի վերջին տուրում Հայաստանի չեմպիոն Երևանի «Նոա»-ն Լեհաստանի Լյուբլին քաղաքում կմրցի Կիևի «Դինամո»-ի հետ: Հանդիպումը կկայանա դեկտեմբերի 18-ին և կմեկնարկի Երևանի ժամանակով կեսգիշերին: «Նոա»-ն արդեն իսկ ապահովել է տեղը Կոնֆերենցիաների լիգայի փլեյ-օֆֆ փուլում:
