Խուսափում են վճարելուց. կա հանրային պահանջ` խստացնել վերահսկողությունը տրանսպորտում. Ավինյան
Նախորդ շաբաթվա ընթացքում Երևանի հանրային տրանսպորտի տոմսային համակարգում արձանագրված վավերացումները բաշխվել են հետևյալ կերպ. տրոյելբուսներ՝ 92161, մետրոպոլիտեն՝ 547663, ավտոբուսներ՝ 1 մլն 872321, ընդամենը՝ 2 մլն 512145: Այս մասին, զեկուցվեց այսօր՝ դեկտեմբերի 15-ին, Երևանի քաղաքապետարանի հերթական գործակարգավարական խորհրդակցության ժամանակ։
Նշվեց, որ առկա է դրական տարբերություն 59034-ով կամ 2.4 տոկոսով:
Երևանի քաղաքապետ Տիգրան Ավինյանn ընդգծեց. «Կա հանրային պահանջ` խստացնել վերահսկողությունը տրանսպորտում։ Մարդիկ ինձ գրում են, ասում են՝ շատերը, հիմնականում երիտասարդները, չարամտորեն խուսափում են վճարելուց: Ակնկալում եմ, որ այս առումով կոնկրետ քայլեր են արվելու։ Գիտեմ, որ դեկտեմբերին հաստիքացուցակում նոր մարդիկ են ավելանալու՝ վերահսկողությունն ավելի արդյունավետ կազմակերպելու համար»,- ասաց Ավինյանը:
