Լիտվայում արտակարգ դրություն է՝ մաքսանենգ օդապարիկների պատճառով

Լիտվայի կառավարությունը որոշում է կայացրել արտակարգ դրության ռեժիմ հայտարարել մաքսանենգ ապրանքներով օդապարիկների պատճառով, որոնք, ենթադրաբար, արձակվում են Բելառուսի կողմից։

Արտակարգ իրավիճակի ռեժիմը, ինչպես հայտարարվել է կառավարության դեկտեմբերի 9-ի նիստում, կտարածվի ամբողջ երկրի վրա։ Ընդ որում, Delfi-ն գրում է, որ կառավարությունում ընդգծել են, որ այն անհարմարություններ չի պատճառի բնակիչներին, սակայն թույլ կտա ավելի արդյունավետ կերպով ուժեր ու միջոցներ ներգրավել անվտանգության ապահովման համար։

Արտակարգ իրավիճակի ռեժիմի շրջանակներում, մասնավորապես, նախատեսվում է զինվորականներին ներգրավել փաստաթղթերի և ավտոտրանսպորտային միջոցների ստուգումներին, որոշակի տարածք մուտքի սահմանափակմանը կամ տրանսպորտային միջոցների երթևեկության արգելքի կազմակերպմանը։

Ամբողջ երկրում արտակարգ իրավիճակի ռեժիմ հայտարարելու որոշումը կառավարությունում բացատրել են նրանով, որ «անօրինական գործունեության կազմակերպիչները հարմարվում են պետության կողմից ձեռնարկվող միջոցներին» և կարող են իրենց գործողությունները տեղափոխել, եթե արտակարգ իրավիճակի ռեժիմը սահմանափակվի միայն մեկ տարածքով։

Լիտվան բազմիցս հայտնել է իր երկնքում մաքսանենգ ապրանքներով օդապարիկների մասին՝ պնդելով, որ դրանք արձակվում են Բելառուսի տարածքից, իսկ հարևան երկրի իշխանությունները դրան գոնե չեն խոչընդոտում։ Օդապարիկների պատճառով Լիտվայի օդանավակայանները ստիպված են եղել դադարեցնել աշխատանքը։

Լիտվան հոկտեմբերի վերջին փակել էր Բելառուսի հետ ցամաքային սահմանը։ Մյադինինկայ և Շալչինինկայ անցակետերի փակման պատճառով Բելառուսում մնացել են Լիտվայից ավելի քան հազար բեռնատար ֆուրգոններ։ Ենթադրվում է, որ մաքսանենգ ապրանքներով օդապարիկների պատճառով մտցված այս միջոցը կգործի մինչև նոյեմբերի 30-ը, սակայն որոշվել է սահմանային անցումների աշխատանքը վերսկսել ավելի շուտ։