Թրամփի վարչակազմը հաստատել է DOGE-ի դադարեցումը

Իլոն Մասկի գլխավորած Պետական արդյունավետության դեպարտամենտը (DOGE) դադարեցրել է աշխատանքը դեռևս իր մանդատի ավարտից ութ ամիս առաջ։ Այս մասին, ըստ Reuters-ի, հայտնել է ԱՄՆ անձնակազմի հարցերով վարչության տնօրեն Սքոթ Կուպորը՝ առաջին անգամ պաշտոնապես հաստատելով կառույցի դադարեցման մասին տեղեկությունները։

«Այն գոյություն չունի»,- ասել է Կուպորը՝ պատասխանելով DOGE-ի գործունեության վերաբերյալ հարցին։ Նրա խոսքով՝ կառույցը այլևս «կենտրոնացված միավոր» չի համարվել վերջին ամիսներին։

Լրատվամիջոցը նշում է, որ DOGE-ին վերապահված գործառույթների մեծ մասը փոխանցվել է անձնակազմի հարցերով վարչությանը, որը դաշնային կառավարության հիմնական կադրային մարմինն է։