ԱՄՆ խաղաղության ծրագրից որոշ կետեր հանվել են. Լեհաստանի վարչապետ
Լեհաստանի վարչապետ Դոնալդ Տուսկը Լուանդայում անցկացված Ուկրաինայի վերաբերյալ ԵՄ ոչ պաշտոնական գագաթնաժողովից հետո հայտարարել է, որ եվրոպացի ղեկավարները անընդունելի են համարում ԱՄՆ-ի ռուս-ուկրաինական հակամարտության կարգավորման ծրագրի 28 կետերից մի մասը, փոխանցում է ТАСС-ը։
Նրա խոսքով՝ «ուռա-լավատեսության համար քիչ հիմքեր կան», և ԵՄ առաջնորդները միաձայն են, որ մի քանի ժամ առաջ ներկայացված կետերի վրա աշխատանքը պետք է շարունակվի, քանի որ դրանցից որոշներն ընդունելի չեն։
Տուսկը նշել է, որ եվրոպացի ղեկավարներին չի բավարարում Ուկրաինայի զինված ուժերի թվաքանակի կրճատման առաջարկված կետը։ Նա ընդգծել է նաև Ռուսաստանի նկատմամբ պատժամիջոցային ճնշումը պահպանելու անհրաժեշտությունը։ Տուսկը տեղեկացրել է, որ Կիևի անվտանգության երաշխիքի նպատակով ՆԱՏՕ-ի կործանիչներ Լեհաստան տեղափոխելու կետը ծրագրից հանվել է։
Հավելենք՝ Լուանդայում՝ ԵՄ-Աֆրիկյան միության գագաթնաժողովի ընթացքում, կայացել է եվրոպացի առաջնորդների ոչ պաշտոնական հանդիպումը Ուկրաինայի հարցով, որի հիմնական թեման եղել է ԱՄՆ-ի ներկայացրած խաղաղ կարգավորման ծրագիրը։
