Թրամփը՝ միջուկային զենքի մասին. «Կարող ենք աշխարհը պայթեցնել 150 անգամ»

ԱՄՆ նախագահ Դոնալդ Թրամփը CBS News-ին տված հարցազրույցում հայտարարել է, որ Միացյալ Նահանգները ունի աշխարհում ամենաշատ միջուկային զենքը՝ բավականաչափ, որպեսզի «աշխարհը պայթեցնի 150 անգամ»։

«Դե, մենք ավելի շատ միջուկային զենք ունենք, քան որևէ այլ երկիր։ Ռուսաստանը երկրորդն է։ Չինաստանը՝ հեռավոր երրորդ։ Բայց հինգ տարի հետո նրանք հավասար կլինեն... Մենք բավականաչափ միջուկային զենք ունենք աշխարհը 150 անգամ պայթեցնելու համար»,- ասել է Թրամփը։

Նա նաև շեշտել է ապամիջուկայնացման վերաբերյալ բանակցությունների կարևորությունը Ռուսաստանի և Չինաստանի առաջնորդների հետ։ Միևնույն ժամանակ Թրամփը արդարացրել է միջուկային փորձարկումները վերսկսելու իր որոշումը՝ նշելով, որ «պետք է տեսնել, թե ինչպես են դրանք աշխատում»։

«Ռուսաստանը հայտարարել է, որ փորձարկումներ է անցկացնելու։ Հյուսիսային Կորեան նույնպես անընդհատ փորձարկումներ է անում։ Մենք միակ երկիրն ենք, որը չի փորձարկում, և ես չեմ ուզում լինել միակը»,- հավելել է ԱՄՆ նախագահը։