Հայաստանում կկառուցվեն հինգ նոր ջրամբարներ․ ՏԿԵ նախարար

ՀՀ տարածքային կառավարման և ենթակառուցվածքների նախարար Դավիթ Խուդաթյանը 2026թ․ պետական բյուջեի նախնական քննարկման ժամանակ տեղեկացրել է, որ հանրային ներդրումային կոմիտեն հինգ ջրամբարների նախագծերին տվել է դրական եզրակացություն։ Նրա խոսքով՝ պատրաստ են Քասախի, Ելփինի, Լիճքի, Արթիկի և Աստղաձորի ջրամբարների շինարարական նախագծերը, և դրանց իրականացումը կմեկնարկի 2026 թվականին։

Նախարարը նշել է, որ նույն թվականին 12 ջրամբարի համար կիրականացվեն տեխնիկատնտեսական հաշվարկներ, որոնց համար նախատեսված է 1 միլիարդ դրամ։ Բացի այդ, ջրամբարների վերազինման նպատակով 2026թ․ բյուջեում նախատեսված է 264,3 միլիոն դրամ։

Հիշեցնենք, որ 2024թ․ Ազգային ժողովի մշտական հանձնաժողովների համատեղ նիստում, 2025թ․ բյուջեի նախագծի քննարկման ժամանակ, այն ժամանակ նախարարի պաշտոնը զբաղեցնող Գնել Սանոսյանը հայտնել էր, որ 2025 թվականին նախատեսվում է սկսել հինգ փոքր ջրամբարի շինարարություն, ինչպես նաև պատրաստ են 28 շատ փոքր ջրամբարների նախագծեր։

Հավելենք՝ փոքր ջրամբարները նպաստում են խոշոր ջրամբարներից դեպի ջրանցքներ ջրի մատակարարման կարգավորմանը։