ՏԵՍԱՆՅՈՒԹ․ Ալեն Սիմոնյանը՝ Փաշինյան-Ալիև սպասվող հանդիպման մասին
Հնարավոր է, որ ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը մինչև ամսվա վերջ հանդիպեն։ Լրագրողների հետ ճեպազրույցում այս մասին ասաց ՀՀ ԱԺ նախագահ Ալեն Սիմոնյանը։
«Մենք չենք բացառում, որ հանդիպումը կլինի։ Որևէ ինֆորմացիա չկա, թե որտեղ է լինելու, բայց մենք կաղապարված չենք միայն Բրյուսելում հանդիպելու տարբերակով։ Պատրաստ ենք յուրաքանչյուր բովանդակային քննարկման։ Երեկ փոխվարչապետերն են հանդիպել, բայց երկրի ղեկավարների մասով դեռ կոնկրետ ինֆորմացիա չունենք»,– նշեց նա։
Հարցին` արդյոք մինչև ամսվա վերջ կարող է լինել հանդիպումը, ԱԺ խոսնակն ասաց. «Հնարավոր է»։
Նա ընդգծեց, որ բոլոր կողմերը (Բրյուսել, Վաշինգտոն. խմբ.) փորձում են հանդիպում կազմակերպել, սակայն հստակ որոշում դեռ չկա։
Հիշեցնենք` դեկտեմբերի 6-ին ՀՀ կառավարությունը հայտնեց, որ Մոսկվայում կայացել է Հայաստանի Հանրապետության փոխվարչապետ Մհեր Գրիգորյանի, Ռուսաստանի Դաշնության փոխվարչապետ Ալեքսեյ Օվերչուկի և Ադրբեջանի Հանրապետության փոխվարչապետ Շահին Մուստաֆաևի համանախագահությամբ եռակողմ աշխատանքային խմբի 11-րդ նիստը:
Նիստի ընթացքում քննարկվել են հարցեր` կապված Հայաստանի Հանրապետության, Ադրբեջանի Հանրապետության և Ռուսաստանի Դաշնության միջև ու տարածաշրջանում երկաթուղու կառուցման, երկաթուղային հաղորդակցության զարգացման և փոխադրումների կազմակերպման հետ։
