Լեհաստանի նախկին նախարարը մեղադրվում է կազմակերպված հանցագործությունում
Լեհաստանի գլխավոր դատախազության մամուլի քարտուղար Աննա Ադամյակը հայտնել է, որ քննության ընթացքում պարզվել է՝ Լեհաստանի նախկին արդարադատության նախարար և գլխավոր դատախազ Զբիգնև Զյոբրոն, զբաղեցնելով արդարադատության նախարարի պաշտոնը, ստեղծել և ղեկավարել է հանցավոր խումբ, որը հափշտակել է պետական միջոցներ։ Ըստ նախաքննության՝ խոսքը վերաբերում է ավելի քան 150 միլիոն զլոտու յուրացմանը՝ «Արդարադատության հիմնադրամից», որը պետք է աջակցեր հանցագործությունների զոհերին և նրանց ընտանիքներին։
«Քննիչը, ուսումնասիրելով ապացույցները, հաստատել է, որ Զյոբրոն, լինելով նախարար, կազմակերպել է հանցավոր խումբ և ղեկավարել դրա գործունեությունը։ Խումբը յուրացրել է հիմնադրամի ֆինանսական միջոցները և կեղծ փաստաթղթեր կազմել»,-նշել է Ադամյակը։
Նրա խոսքով՝ խումբը բաղկացած էր արդարադատության նախարարության որոշ պաշտոնյաներից, ինչպես նաև հիմնադրամից ֆինանսավորում ստացած կառույցների հետ կապված անձանցից։ Զյոբրոյին մեղադրանք է առաջադրվելու Լեհաստանի Քրեական օրենսգրքի 258-րդ հոդվածի 3-րդ պարբերությամբ՝ «կազմակերպված հանցավոր խմբի ստեղծում և ղեկավարում»։
Գլխավոր դատախազ Վալդեմար Ժուրեկը արդեն դիմել է Լեհաստանի սեյմին՝ խնդրելով համաձայնություն տալ Զյոբրոյին քրեական պատասխանատվության ենթարկելու համար, քանի որ նա խորհրդարանի պատգամավոր է և օգտվում է պատգամավորական անձեռնմխելիությունից։
Լեհաստանի վարչապետ Դոնալդ Տուսկը, մեկնաբանելով գործը, նշել է, որ Զյոբրոն ընդհանուր առմամբ կասկածվում է 26 տարբեր հանցագործությունների մեջ։
