Ֆինանսների նախարարը՝ կենսաթոշակների բարձրացման մասին
Ազգային ժողովի հանձնաժողովների համատեղ նիստում Ֆինանսների նախարար Վահե Հովհաննիսյանը անդրադարձել է կենսաթոշակների բարձրացման վերաբերյալ ընդդիմության քննադատություններին՝ նշելով, որ նման քայլը այս փուլում կարող է բացասական հետևանքներ ունենալ։
«Եթե մենք կենսաթոշակն այսօր բարձրացնենք և հասցնենք պարենային զամբյուղին համապատասխան մակարդակի, դա կբերի ֆինանսական միջավայրի անկայունության։ Արդյունքում նույն թոշակառուները կունենան ավելի վատ կենսամակարդակ, քան այսօր»,- ասել է նախարարը։
Նրա խոսքով՝ կառավարությունը վերջին տարիներին ապահովել է խոստացած տնտեսական աճը, իսկ պետական պարտքը նվազեցվել է 60 տոկոսից պակաս՝ հասնելով 50 տոկոսի սահմանին։ Հովհաննիսյանը շեշտել է, որ սոցիալական ոլորտում նույնպես արձանագրվել է զգալի առաջընթաց, սակայն ցանկացած որոշում պետք է հիմնված լինի ֆինանսական կայունության պահպանման սկզբունքի վրա։
