Զելենսկին ծաղրել է Պուտինին՝ Դոնբասը վերցնելու անհաջող փորձի համար

Ուկրաինայի նախագահ Վոլոդիմիր Զելենսկին «Axios»-ին տված հարցազրույցում ասել է, որ Ռուսաստանի նախագահ Վլադիմիր Պուտինը դաշնակիցների հետ մասնավոր զրույցներում պարծենում էր՝ խոստանալով մինչև հոկտեմբերի 15-ը լիակատար վերահսկողություն հաստատել Դոնբասի նկատմամբ։

Զելենսկու խոսքով՝ այս տեղեկությունը ստացվել է ուկրաինական հետախուզությունից։ Նա հավելել է, որ, չնայած նման հավակնություններին, Ռուսաստանը չի կարող իրականացնել այդ պլանը՝ մարդկային և ռազմական ռեսուրսների պակասի պատճառով։

«Նրա ուժեղ ստորաբաժանումները ոչնչացվել են։ Այսօր մարտի դաշտում իրավիճակը գրեթե չի փոխվել վերջին երկու-երեք ամիսներին», - նշել է Զելենսկին։

Ուկրաինայի նախագահի փոխանցմամբ՝ Ռուսաստանն այս տարի կորցրել է մոտ 346 հազար զինծառայող՝ սպանվածների և վիրավորների հաշվարկով, ինչը գրեթե համարժեք է նույն ժամանակահատվածում մոբիլիզացվածների թվին։

Զելենսկին ընդգծել է, որ Մոսկվայի պլանները ձախողվել են ոչ միայն Ուկրաինայի դիմադրության, այլև Ռուսաստանի սպառվող ռազմական ներուժի պատճառով։