Կառավարությունը 55 միլիարդ դրամ կհատկացնի Արցախի տեղահանվածներին

Հայաստանի կառավարությունը նախատեսում է 2026 թվականին 55 միլիարդ դրամ ուղղել Լեռնային Ղարաբաղից բռնի տեղահանված քաղաքացիների աջակցությանը։ Այս մասին Ազգային ժողովում հայտարարեց վարչապետ Նիկոլ Փաշինյանը՝ ներկայացնելով պետական բյուջեի նախագիծը։

Վարչապետի խոսքով՝ միջոցները կծառայեն բնակապահովման, սոցիալական և տնտեսական խնդիրների լուծմանը, որոնք առաջացել են տեղահանությունից հետո։ «55 միլիարդ դրամ տրամադրվելու է Ղարաբաղի մեր քույրերի ու եղբայրների բնակապահովման ու այլ կարիքների համար»,- ասել է Փաշինյանը։

Նա ընդգծել է, որ կառավարությունը շարունակելու է աջակցել Արցախից տեղահանված բոլոր ընտանիքներին՝ ապահովելով նրանց կայուն սոցիալական պայմաններ և ներգրավելով տնտեսական ծրագրերում։

2026 թվականի պետական բյուջեն, ըստ վարչապետի, ուղղված է լինելու ոչ միայն սոցիալական խնդիրների մեղմացմանը, այլև տնտեսական աճի պահպանմանը և երկարաժամկետ կայուն զարգացմանը։