Բրիթնի Սփիրսի ընտանիքը մտահոգ է երգչուհու վարքով

Բրիթնի Սփիրսի ընտանիքը լուրջ անհանգստություն է հայտնել նրա հոգեբանական վիճակի և վարքագծի կապակցությամբ։ Այս մասին հաղորդում է Daily Mail-ը։

Աղբյուրների խոսքով՝ Սփիրսի ընտանիքը արտակարգ քննարկումներ է անցկացնում՝ մտավախություն ունենալով, որ նրա ներկայիս վիճակը հիշեցնում է 2007 թվականի հայտնի ճգնաժամը, երբ Բրիթնին կորցրեց որդիների խնամակալությունը և հոսպիտալացվեց։ Ներքին աղբյուրներից մեկը նշել է, որ ընտանիքը փորձում է գտնել միջամտության ձև, որը չի վնասի երգչուհու ազատությանը, բայց կօգնի վերականգնել  նրա հավասարակշռությունը։

«Բոլորը ցանկանում են, որ նա առողջ լինի, բայց դժվար է որոշել՝ ինչպես միջամտել առանց նրան վնասելու», – ասել է ընտանիքին մոտ կանգնած անձը։ Մեկ այլ աղբյուր հավելել է, որ Բրիթնին նորից խնամքի կարիք ունի, քանի որ նրա շուրջ հիմա չկա վստահելի միջավայր։

Բրիթնիի վարքագիծը մտահոգիչ է նաև նախկին ամուսնու՝ Քևին Ֆեդերլայնի վիճահարույց հայտարարությունների ֆոնին, որտեղ նա հիշատակել է երգչուհու անպատշաճ վարքագծի դրվագները որդիների հետ հարաբերություններում։ Սփիրսի ներկայացուցիչները, սակայն, հերքել են այդ պնդումները՝ ընդգծելով, որ երգչուհին շարունակում է հոգ տանել իր երեխաների մասին և իր անունը շահարկելու փորձերին չի արձագանքում։