Ռուսաստանը դեմ է Թրամփի գաղափարին․ Լավրով

ՌԴ արտաքին գործերի նախարար Սերգեյ Լավրովը հայտարարել է, որ Ուկրաինայում անհապաղ հրադադարի կոչերը հակասում են Ալյասկայում Դոնալդ Թրամփի և Վլադիմիր Պուտինի հանդիպման ժամանակ ձեռք բերված պայմանավորվածություններին։ Այս մասին հայտնում է «Ռիա Նովոստի»-ն։

«Հիմա Վաշինգտոնից սկսել է հնչել, որ պետք է անհապաղ կանգ առնել, այլևս ոչինչ չքննարկել։ Կանգ առնել, իսկ այնտեղ թող պատմությունը դատի։ Հասկանո՞ւմ եք, եթե պարզապես կանգ առնենք, դա նշանակում է մոռանալ այդ կոնֆլիկտի արմատական պատճառների մասին, որոնք ամերիկյան վարչակազմը Դոնալդ Թրամփի իշխանության գալով հստակ հասկանում էր», - հայտարարել է Լավրովը։

Լավրովի խոսքով՝ Ուկրաինայի նախագահ Վլադիմիր Զելենսկու «եվրոպացի հովանավորներն ու տերերը» փորձում են համոզել ամերիկացիներին փոխել իրենց դիրքորոշումը և հրաժարվել «երկարաժամկետ կարգավորման» ձգտումից։ Նա նշել է, որ «նման մոտեցումը բոլորովին հակառակն է այն բանի, ինչի մասին նախագահներ Թրամփը և Պուտինը համաձայնության եկան Անքորիջում, երբ նրանք համաձայնեցին կենտրոնանալ հակամարտության արմատական ​​պատճառների վրա»։