Ամերիկացիներն էլ ավելի շատ են սկսել հրաժարվել իրենց քաղաքացիությունից
Ամերիկացիները զանգվածաբար սկսել են հրաժարվել իրենց քաղաքացիությունից, գրում է Washington Post-ը՝ հղում անելով մարդու իրավունքների պաշտպաններին։
Հրապարակման համաձայն՝ արտասահմանում բնակվող 5-6 հազար ամերիկացիներ ամեն տարի հրաժարվում են իրենց ԱՄՆ քաղաքացիությունից։ Թերթին հարցազրույց տված փաստաբանների կարծիքով՝ հարկային և լոգիստիկ խնդիրները ամենատարածված պատճառներն են, սակայն վերջերս քաղաքականությունը գնալով ավելի կարևոր է դառնում։
Ինչպես նշում է պարբերականը, Միացյալ Նահանգները երկու երկրներից մեկն է (Էրիթրեայի հետ միասին), որոնք քաղաքացիներին հարկում են քաղաքացիության, այլ ոչ թե բնակության հիման վրա, ինչը նշանակում է, որ արտասահմանում բնակվող ամերիկացիները պարտավոր են տարեկան հաշվետվություններ ներկայացնել Ներքին եկամուտների ծառայությանը՝ իրենց հայրենիքի կողմից պահանջվող հաշվետվություններից բացի։
Այս բեռի պատճառով շատ արտագաղթողներ սկսում են լրջորեն մտածել իրենց «արծվի պատկերով անձնագրից» հրաժարվելու մասին։ Ավելին, գրում է թերթը, անձնագրից հրաժարվելու պահանջարկը հատկապես բարձր է Մեծ Բրիտանիայում բնակվող ամերիկացիների շրջանում:
