Մենք հասնում ենք այն կարևոր նպատակներից մեկին, որի համար սկսել ենք պատերազմը. Իսրայելի բանակի շտաբի պետ

Իսրայելի բանակի շտաբի պետ, գեներալ-լեյտենանտ Էյալ Զամիրը տեսաուղերձում հայտարարել է, որ վերջին երկու տարիներին ՀԱՄԱՍ-ի վրա գործադրված ռազմական ճնշումը՝ զուգակցված «լրացուցիչ դիվանագիտական քայլերով», հանգեցրել է խմբավորման նկատմամբ «հաղթանակի», հաղորդում է Times of Israel-ը։

«Պատանդներին վերադարձնելով՝ մենք հասնում ենք այն կարևոր նպատակներից մեկին, որի համար սկսել ենք պատերազմը։ Դա ազգային, բարոյական և հրեական պարտավորություն է»,- ասել է Իսրայելի բանակի շտաբի պետը։

 Նա ընդգծել է, որ բանակը գործել է «հստակ և պրոֆեսիոնալ, համակարգված և պատասխանատու»։ Ըստ նրա, կայացվել են բարդ որոշումներ՝ պատանդների անվտանգությանը չվնասելու և զինծառայողների կորուստները նվազագույնի հասցնելու համար։

Զամիրը հավելել է, որ Իսրայելը դեռ «մնացել է բազմաճակատ պատերազմի էպիկենտրոնում», իսկ Իսրայելի պաշտպանության բանակի գործողությունները «փոխում են իրավիճակը Մերձավոր Արևելքում»։