Արցախի հարցը չի կարող փակվել․ Սամվել Շահրամանյան
Արցախ վերադարձի հարցը միայն արցախցիների հարցը չէ, այլ հայկական հարց է և ակնկալում ենք, որ դրա շուրջ կունենանք կոնսենսուս, որն այս պահին, ցավոք, չկա։ Այս մասին Եռաբլուրում ասել է Արցախի նախկին նախագահ Սամվել Շահրամանյան։
«Արցախի հարցը չի կարող փակվել, քանի դեռ արցախցին զրկված է իր հայրենիքից, իր գերեզմաններից, սրբություններից։ Մենք համարում ենք, որ վաղ թե ուշ այս ամենը համապատասխան գնահատական ստանա»,-ասել է նա։
Անդրադառնալով Արցախի ռազմաքաղաքական ղեկավարության գերեվարության հարցին` նա նշել է, որ ՀՀ իշխանություններն իր հետ չեն հանդիպել ու քննարկում չեն ունեցել։
«Բռնի տեղահանումից հետո հարց ենք բարձրացրել 2023թ․ ագրեսիայի հետևանքով զոհված, Ստեփանակերտի եղբայրական գերեզմաններում և շրջաններում հուղարկավորված շուրջ 66 անձանց աճյուններն արտաշիրիմելու և «Եռաբլուրում» վերահուղարկավորելու համար»,-ասել է Սամվել Շահրամանյանը։
Նրա խոսքով՝ հարցը դեռ 2 տարի առաջ քննարկվել է թե՛ ՀՀ իշխանությունների, թե՛ Ադրբեջանի ներկայացուցիչների հետ, նախնական համաձայնություն ստացել են, սակայն մինչ օրս գործընթացը տեղի չի ունեցել։
