Լավրովը` Հայաստանի և Ադրբեջանի միջև Վաշինգտոնում կնքված համաձայնագրի մասին
Երևանի և Բաքվի համաձայնագիրը մեր հարևանների ինքնիշխան իրավունքն է: Այս մասին հայտնել է Ռուսաստանի արտաքին գործերի նախարար Սերգեյ Լավրովը:
Միևնույն ժամանակ, նախարարը նշել է, որ անհրաժեշտ է հետևել, թե ինչպես կգործի այս համաձայնագիրը։
Լավրովի խոսքով, Ադրբեջանի և Հայաստանի միջև համաձայնագրից հետո «ոգևորված բացականչությունները» փաստաթղթի հրապարակումից հետո փոխարինվել են սկեպտիկ գնահատականներով։
Դիվանագետը հավելել է, որ Հարավային Կովկասի տարածաշրջանում Ռուսաստանի Դաշնության հիմնական առաջնահերթությունները խաղաղությունն ու համագործակցությունն են, դրանք երբեք չեն փոխվել։
Լավրովը նշել է, որ Ռուսաստանը՝ ի դեմս Ռուսաստանի նախագահ Վլադիմիր Պուտինի, վճռորոշ դեր է խաղացել խաղաղության համաձայնագրի ձեռքբերման գործում՝ Ռուսաստանի, Հայաստանի և Ադրբեջանի առաջնորդների միջև «գիշերային բազմաթիվ հեռախոսազրույցների» միջոցով։
Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։
