Ռյուտեն՝ Ուկրաինային տրամադրվող հակաօդային պաշտպանության համակարգերի գործընթացի արագացման մասին
ՆԱՏՕ-ի գլխավոր քարտուղար Մարկ Ռյուտեն ՆԱՏՕ-ի բոլոր երկրներին կոչ է արել արագացնել Կիևին զենքի ամերիկյան մատակարարումների պատվերներն ու վճարումը: Այս մասին նա հայտարարել է Բրյուսելում Էստոնիայի նախագահ Ալար Կարիսի հետ կայացած մամուլի ասուլիսում, փոխանցում է Reuters գործակալությունը։
Նա նշել է, որ մի քանի շաբաթվա ընթացքում 2 միլիարդ եվրոյի ամերիկյան օգնությունը, որի համար վճարել են եվրոպական երկրները, արդեն փոխանցվել է Ուկրաինային՝ «զինամթերքից մինչև առաջադեմ հակաօդային պաշտպանության համակարգեր»։
«Ես կոչ եմ անում բոլոր դաշնակիցներին նպաստել այս և այլ նախաձեռնություններին, որոնք կենսական օգնություն են մատակարարում Ուկրաինային», - հավելել է ՆԱՏՕ-ի գլխավոր քարտուղարը։
Հավելենք՝ ավելի վաղ ԱՄՆ նախագահ Դոնալդ Թրամփը հայտարարել էր, որ Վաշինգտոնը որոշում է կայացրել շարունակել զենք և ռազմական տեխնիկա փոխանցել Կիևին, եթե Եվրոպան վճարի այդ մատակարարումների համար:
