Թուրքիայի նախագահը գոհունակություն է հայտնել․ մանրամասներ՝ Էրդողան-Փաշինյան բանակցություններից

Թուրքիայի նախագահ Ռեջեփ Թայիփ Էրդողանը գոհունակություն է հայտնել ՀՀ-ի և Ադրբեջանի միջև խաղաղության գործընթացի առաջընթացի կապակցությամբ։ Էրդողանի գրասենյակը մանրամասներ է ներկայացրել Էրդողանի և Փաշինյանի բանակցություններից։ 

«Թուրքիան աջակցում է տարածաշրջանում խաղաղությանը, կայունությանը և զարգացմանը և կշարունակի իր ներդրումն ունենալ այս գործընթացում», - հայտնել են գրասենյակից։

Էրդողանը նաև նշել է, որ գնահատում է Թուրքիայի և Հայաստանի միջև համագործակցության ընդլայնմանն ուղղված քայլերը։

ՀՀ Կառավարությունից էլ հայտնել են, որ զրուցակիցները կարևորել են տարածաշրջանում կայունության և խաղաղության հաստատմանը միտված քայլերը։

«Վարչապետ Փաշինյանը և նախագահ Էրդողանը շեշտել են կառուցողական մոտեցումների պահպանման անհրաժեշտությունը՝ փոխվստահության մթնոլորտի ձևավորման և տարածաշրջանային հաղորդակցությունների զարգացման նպատակով։

Կողմերը պայմանավորվել են շարունակել երկխոսությունը»,-ասվում է հաղորդագրության մեջ։

Նշենք, որ ՀՀ վարչապետ Նիկոլ Փաշինյանը ՇՀԿ գագաթնաժողովի շրջանակում է հանդիպում ունեցել Թուրքիայի նախագահ Ռեջեփ Թայիփ Էրդողանի հետ: Վարչապետը տեսանյութ է հրապարակել հանդիպումից։