Հայկական բանկերը տվյալներ են հավաքում Հայաստանում հաշիվներ ունեցող ռուսաստանցիներից

Ռուսաստանի հետ տեղեկատվության առաջին ավտոմատ փոխանակման համար հայկական բանկերը սկսել են տվյալներ հավաքել հանրապետությունում հաշիվներ ունեցող ռուսաստանցիների հարկային ռեզիդենտության վերաբերյալ, հայտնում է РБК-ն։

Սա նշանակում է, որ Ռուսաստանի քաղաքացիների և Հայաստանում ռուսաստանցիներին պատկանող ընկերությունների եկամուտների և ակտիվների վերաբերյալ տեղեկատվությունը տեսանելի կդառնա ՌԴ Դաշնային հարկային ծառայության համար։

Հոդվածում մեջբերվում են «NSV Consulting»-ի կառավարիչ գործընկեր Սերգեյ Նազարկինի խոսքերը, որ արտասահմանյան հաշիվներ բացելու համար Հայաստանը դարձել է ռուսաստանցիների շրջանում ամենատարածված հետխորհրդային պետությունը։ Տուգանքներից խուսափելու համար բանկերն ինքնուրույն են որոշում հաճախորդների հարկային ռեզիդենտությունը։

Հայաստանի ֆինանսական շուկայի աղբյուրը հաստատել է տեղական կարգավորող մարմիններից պահանջներ ստանալու փաստը: Տեղեկությունը չտրամադրելու պարագայում հաշիվների սպասարկումը կասեցվում է: Հարցումներն ուղարկվում են ոչ միայն անձնական հաշիվների տերերին, այլև ընկերությունների վերահսկող անձանց և շահառուներին:

«Նադմիտով, Իվանով և գործընկերներ» իրավաբանական ընկերության կառավարիչ գործընկեր Ալեքսանդր Նադմիտովը նշել է, որ Հայաստանի բանկային համակարգը դարձել է միջազգային հաշվարկների հարմար խողովակ: Ռուսաստանից արտահանման եկամուտներ ստանալու կամ ներմուծման համար միջոցներ փոխանցելու համար արտասահմանյան ընկերությունները հանրապետությունում հաշիվներ են բացում:

Հայաստանը 2023 թվականին վավերացրել է ֆինանսական տեղեկատվության ավտոմատ փոխանակման մասին բազմակողմ համաձայնագիրը և այս տարի սկսել է համապատասխան փոխանակումները: Ռուսաստանը CRS ստանդարտին միացել է 2016 թվականին, իսկ ավտոմատ փոխանակումները սկսել է 2018 թվականից:

ՌԴ Դաշնային հարկային ծառայությունը հաստատել է ավտոմատ փոխանակման երկրների ցանկը՝ ներառելով նաև Հայաստանը։