12:00 Լուրերը մեկ տողով. Հայաստանի դրոշի շուրջ աղմկահարույց սկանդալն ու Ռուսաստանի հնարավոր վերադարձը «Եվրատեսիլ»

Անցած ժամվա լուրերը՝ հակիրճ և բովանդակային.

•Ճանապարհների վիճակը և սահմանափակումները. Հայաստանի ավտոճանապարհները հիմնականում անցանելի են, սակայն մայրաքաղաքում Ուսանողների և երիտասարդների օրվա միջոցառումներով պայմանավորված գործում են երթևեկության ժամանակավոր սահմանափակումներ:

•Ապօրինի զենքի հայտնաբերում. Ոստիկանության ձեռնարկած լայնամասշտաբ միջոցառումների և բացատրական աշխատանքների արդյունքում հանրապետությունում հայտնաբերվել, առգրավվել և կամավոր հանձնվել է 825 միավոր ապօրինի զենք ու մեծ քանակությամբ զինամթերք:

•Դատական հայց ընդդեմ Հանրայինի. «Ուժեղ Հայաստան» կուսակցությունը դատական հայց է ներկայացրել Հանրային հեռուստաընկերության դեմ՝ լուրերի թողարկման ընթացքում իրենց հասցեին հնչեցված ենթադրյալ զրպարտությունը հրապարակայնորեն հերքելու պահանջով:

•ԱՄՆ-Թայվան-Չինաստան հարաբերություններ. ԱՄՆ նախագահ Դոնալդ Թրամփը Չինաստան կատարած այցից հետո հայտարարել է, որ բանակցային հաղթաթուղթ պահելու նպատակով չի շտապում Թայվանին 12 միլիարդ դոլարի զենք մատակարարելու հարցում:

•Կոռուպցիոն բացահայտում Ուկրաինայում. Ուկրաինայի հակակոռուպցիոն դատարանը խափանման միջոց է ընտրել շինարարական խոշոր նախագծի ընթացքում միլիոնավոր դոլարների փողերի լվացման գործով ևս չորս կասկածյալի նկատմամբ:

•ԵԱՏՄ-ից դուրս գալու տնտեսական ռիսկերը. Ռուսաստանի Պետդումայի նախագահը հայտարարել է, որ Եվրասիական տնտեսական միությունից հնարավոր դուրս գալը կարող է Հայաստանին արժենալ ՀՆԱ-ի մինչև 20 տոկոսի կամ առնվազն 5 միլիարդ դոլարի կորուստ:

•Միջադեպեր «Եվրատեսիլում». Մրցույթի տնօրենը հայտնել է կանոնների պահպանման դեպքում Ռուսաստանի վերադարձի հնարավորության մասին, մինչդեռ Իսրայելի պետական հեռուստաալիքը հեռարձակման ժամանակ Հայաստանը ներկայացրել է Ադրբեջանի դրոշի ներքո:


•Հայաստանի դրոշի շուրջ աղմկահարույց միջադեպին արձագանքել է Իրանի դեսպանատունը: «Ոչ ոք չի կարող Հայաստանի գեղեցիկ դրոշի փոխարեն մեկ այլ դրոշ ցուցադրել։ Հայաստանը պատմական և քաղաքակրթական ազգ է, և Իրանը միշտ կանգնած է եղել նրա կողքին»,-ասված է Իրանի դեսպանատնից: