Չենք կարող պահանջել, որ Ուկրաինան քննարկի տարածքային զիջումները. Վադեֆուլ

Գերմանիայի արտգործնախարար Յոհան Վադեֆուլը հայտարարել է, որ պատերազմը դադարեցնելու մասին հնարավոր համաձայնագիրը չպետք է «բռնապետական խաղաղություն» դառնա՝ ի վնաս Ուկրաինայի, այս մասին գրում է  DW-ն։

«Ուկրաինայի համար անվտանգության ապագա երաշխիքները պետք է «շատ մոտ» լինեն ՆԱՏՕ-ին անդամակցելուն»,- ընդգծել է նա՝ ելույթ ունենալով Գերմանիայի կառավարության բաց դռների օրվա ժամանակ։

«Մենք չենք կարող պահանջել, որ Ուկրաինան լրջորեն քննարկի տարածքային զիջումները, եթե այն չի ստանում իրական անվտանգության երաշխիքներ որքան հնարավոր է շատ պետություններից, որ առնվազն մնացածը անվտանգ կլինի», - գերմանացի նախարարի խոսքերն է մեջբերում dpa գործակալությունը։

Վադեֆուլը հույս է հայտնել, որ հենց նման անվտանգության երաշխիքների վրա կենտրոնանալը ի վերջո կկարողանա համոզել նաև Պուտինին։ «Այդ դեպքում դա կարող է հիմք դառնալ, որպեսզի մենք՝ Եվրոպայում, վերջապես նորից խաղաղություն ձեռք բերենք»,- նշել է գերմանացի նախարարը։ Նրա խոսքով՝ այս պահին մոտ 30 պետություն, որոնց թվում է նաև Ճապոնիան, պատրաստակամություն են հայտնել աջակցել Ուկրաինային։