Պատրաստ ենք պատերազմել Ռուսաստանի հետ արդեն այս գիշեր. Գերմանիան նախազգուշացնում է

«Մենք պատրաստ ենք պատերազմել Ռուսաստանի հետ արդեն այս գիշեր», - Գերմանիայի ՌՕՈւ հրամանատար Հոլգեր Նոյմանը The Telegraph-ին տված հարցազրույցում հայտարարել է, որ Լյուֆտվաֆեն կործանարար հարվածներ կհասցնի, եթե Մոսկվան հարձակվի ՆԱՏՕ-ի դաշնակիցներից որևէ մեկի վրա։ Գերմանիան պատրաստ է «պատերազմել արդեն այս գիշեր» Ռուսաստանի դեմ և կպաշտպանի ՆԱՏՕ-ի տարածքի «յուրաքանչյուր սանտիմետրը», հայտարարել է Լյուֆտվաֆեի հրամանատարը։

Մոսկվային ուղղված հերթական նախազգուշացման մեջ գեներալ-լեյտենանտ Հոլգեր Նոյմանն ընդգծել է, որ ՆԱՏՕ-ում «չկան անվտանգության տարբեր գոտիներ», այսինքն՝ Էստոնիայի վրա հարձակումը կհանգեցնի նույնպիսի պատասխանի, ինչպիսին կլինի Լոնդոնի վրա օդային հարձակման դեպքում։ Նոյմանը հայտարարել է, որ Ռուսաստանի հյուսիս-արևմուտքում գտնվող Կոլայի թերակղզին, Կալինինգրադը և Սև ծովը կզգան ՆԱՏՕ-ի զայրույթը, եթե դաշինքը ստիպված լինի պաշտպանվել։