Ակնալիճում 2.5 տարեկան երեխան՝ շան կծելու պատճառով, մահացել է

Մեծամոր խոշորացված համայնքի Ակնալիճ գյուղում NEWS.am-ի փոխանցմամբ, արձանագրվել է 2.5 տարեկան երեխայի մահվան դեպք՝ շան կծելու հետևանքով առաջացած կատաղություն հիվանդությունից։

Դեպքից հետո երեխային կատաղության դեմ չեն պատվաստել։ Երեխան հիվանդանոց է տեղափոխվել դեպքից 40 օր անց՝ օգոստոսի 15-ին՝ բարձր ջերմությամբ, դողով ու սարսուռով։ Ախտորոշվել է կատաղություն։

Հիվանդանոցում երեխայի մոտ երկու անգամ արձանագրվել է սրտի կանգ։ Երկրորդի ժամանակ բժիշկներին չի հաջողվել փրկել նրա կյանքը։

Մահացած երեխայի եղբորը նույնպես շունը կծել է: 6 տարեկան երեխան հոսպիտալացված է Նորքի ինֆեկցիոն հիվանդանոցում։ Նրա մոտ գանգատներ չկան, սակայն բժիշկների հսկողության տակ է՝ հիվանդության հնարավոր ընթացքը կանխարգելելու նպատակով։

Առողջապահության նախարարությունը հորդորում է շան կամ որևէ կենդանու կծելու դեպքում դիմել տեղամասային բուժհաստատություն։