Դավիթ Խուդաթյանը՝ ապաշրջափակման և տարածքային ամբողջականության պահպանման մասին

Եթե դեպի Բաքու ճանապարհն անվտանգ է, ապա թող ՔՊ ներկայացուցիչներն առաջինն անցնեն դրանցով լրագրողների դիտարկմանն ի պատասխան՝ ՀՀ տարածքային կառավարման և ենթակառուցվածքների նախարարություն նախարար Դավիթ Խուդաթյանն ասել է.

«Այս պահին դեռ այդ ճանապարհները բացված չեն, և հետևաբար, այդ ճանապարհներով անցնելն ինչպես ՔՊ կուսակցության անդամների, այնպես էլ մյուսների համար հասանելի չէ, բայց մենք արագ և առաջանցիկ տեմպերով գնում ենք դեպի այդ հասանելիությանը ՀՀ բոլոր քաղաքացիների համար»,- նշել է  ՏԿԵ նախարարը:

Նա նաև հավելել  է, որ երբ կոնկրետ դետալային աշխատանքային պրոցեսներ սկսվեն, և ենթադրելի է, որ աշխատանքային խմբեր կստեղծվեն, բոլոր մանրամասները իրենք աշխատանք անելուց հետո հանրությանը պատշաճ կիրազեկեն: Աշխատանքային խմբերի ձևավորմանը երկար սպասելու կարիք և անհրաժեշտություն չի լինի:

Պատասխանելով լրագրողների այն հարցին, թե արդյոք հնարավո՞ր սցենար է, որ հայ սահմանային և մաքսային աշխատողները չիրականացնեն հսկողությունը, Խուդաթյանն ընդգծել է․

«Իրավազորությունը նշանակում է, որ ՀՀ իրավազորության ներքո է գտնվելու ճանապարհը դրանից բխող և՛ տեխնիկական, և՛ բովանդակային բոլոր հարցերով: Մաքսային ստուգման մեթոդի մասին ինֆորմացիա չեմ կարող տալ, դա նեղ մասնագիտական հարց է: Աշխատանքային խմբերը երբ ձևավորվեն, վստահաբար կքննարկեն տեխնիկական դետալները, և երբ ասելիք ձևավորեն հանրությանը, կհրապարակվեն դրանք այն նույն տրամաբանության մեջ, ինչպես հրապարակվեց Խաղաղության պայմանագրի տեքստը:

Քաղաքական ամենակարևոր հարցը, որը ձևակերպվել է փաստաթղթում, տարածքային ամբողջականության, ինքնիշխանության, իրավազորության և փոխադարձելիության սկզբունքի պահպանումն է. դա մի բան էր, որը, ցավոք սրտի, մեր ընդդիմությունը կասկածի տակ էր դնում մինչև փաստաթղթի հրապարակվելը, դա վերաբերում էր նաև Խաղաղության պայմանագրին: Չեմ զլանա ասել, որ այնպիսի լալահառաչ, այնպիսի ողբերգական եթե-ով ձևակերպված հարցեր, ինչպիսին տրվում էին նաև Խաղաղության պայամանագրի տեքստի հետ կապված, որն ամբողջությամբ զրոյացվեց տեքստի հրապարակումից հետո, հիմա նորից նույն պատմությունն է կրկնվում: Բայց մենք չենք թողնի, որ կրկնվի. սկզբունքները հստակեցված են, իմ նշած 4 սկզբունքներն են, որի մասին հայտարարություն են արել և՛ ՀՀ վարչապետը, և՛ ԱՄՆ նախագահը, և՛ Ադրբեջանի նախագահը:

4 սկզբունքներով ապաշրջափակմանը եթե որևէ մեկը թույլ կտա իրեն անվանել միջանցք, ապա դա շահարկում է»: