Սպարտակյանն ազատվել է Եկատերինբուրգում պատվավոր հյուպատոսի պաշտոնից՝ Կարապետյանի կալանքի հարցում ունեցած անհամաձայնության պատճառով
Նարեկ Սպարտակյանն ազատվել է Եկատերինբուրգում պատվավոր հյուպատոսի պաշտոնից։ Այս մասին գրել էր Ռուսական URA.ru–ն, կայքը գրել էր, որ Նարեկ Սպարտակյանը պաշտոնից ազատվել է Հայաստանի ղեկավարության` Հայ առաքելական եկեղեցու հանդեպ դրսևորած դիրքորոշման և գործարար Սամվել Կարապետյանի կալանքի հարցում ունեցած անհամաձայնության պատճառով։
«Նարեկ Սպարտակյանն ազատվել է ՌԴ Եկատերինբուրգի/Սվերդլովսկի մարզում ՀՀ պատվավոր հյուպատոսի պարտականությունները կատարելուց», - ՀՀ ԱԳՆ-ից հայտնել են Sputnik Արմենիային։
Գերատեսչությունը այլ մանրամասներ չի հայտնել։ ԱԳՆ–ն չի պատասխանել նաև այն հարցին, թե արդյոք նման որոշումը կապված է Սպարտակյանի անհամաձայնության հետ։
Հիշեցնենք` Սպարտակյանը հայտարարել էր, որ անթույլատրելի է համարում ցանկացած գործողություն Հայ առաքելական եկեղեցու դեմ, որը համայն հայության հոգևոր միասնության կարևոր հիմքն է։ Ինչ վերաբերում է Կարապետյանի ձերբակալությանը, ապա նա նշել էր, որ ինչպես բոլոր հայերը, այնպես էլ ինքը, շատ է հարգում գործարարին, քանի որ նա վառ օրինակ է, թե ինչպես կարելի է կառուցել և արարել:
Նշենք, որ Սպարտակյանը մեծացել է Եկատերինբուրգում, ավարտել Ելցինի անվան Ուրալի դաշնային համալսարանը։ Նա աշխատել է Սվերդլովսկի մարզի մարդու իրավունքների հանձնակատարի աշխատակազմում։ Պատվավոր հյուպատոս էր նշանակվել 2018 թվականին։
