Իրանում մահապատժի են ենթարկել երկու տղամարդու՝ Իսրայելի հետ կապ ունենալու համար

Իրանը մահապատժի է ենթարկել ահաբեկչության և լրտեսության մեջ մեղադրվող երկու անձանց։ Այս մասին հաղորդում է IRNA պաշտոնական լրատվական գործակալությունը՝ հղում անելով դատական մարմինների հայտարարությանը։

Հաղորդագրության համաձայն՝ Մեհդի Ասկարզադեն, որը մեղադրվում էր ԴԱԻՇ ահաբեկչական կազմակերպության գործունեությանը մասնակցելու մեջ, և Ռուզբե Վադին, որը մեղավոր էր ճանաչվել Իսրայելի հետախուզական գործակալություն Մոսսադի օգտին լրտեսելու մեջ, մահապատժի են ենթարկվել առավոտյան։ Դատավճիռները նախկինում հաստատվել էին Իրանի Գերագույն դատարանի կողմից։

Հետաքննության տվյալներով՝ Ասկարզադեն ռազմական և գաղափարախոսական պատրաստվածություն է անցել Սիրիայում և Իրաքում, մասնակցել է Սիրիայում ռազմական գործողություններին, ինչպես նաև ահաբեկչական գործողություններ է նախապատրաստել Իրանի ներսում։

Ռուզբե Վադին ենթադրաբար աշխատել է երկրի կարևորագույն պետական հաստատություններից մեկում և կապի մեջ է մտել «Մոսադի» գործակալների հետ սոցիալական ցանցերի միջոցով։ Հետաքննության ընթացքում պարզվել է, որ նա նրանց հետ հանդիպել է Ավստրիայի մայրաքաղաք Վիեննայում։

Իրանական կողմը նաև պնդում է, որ Վադին Իսրայելին գաղտնի տեղեկություններ է փոխանցել իրանցի առաջատար միջուկային փորձագետի մասին, որը հետագայում սպանվել է իսրայելական հարվածի արդյունքում։