Մեդվեդևը խորհուրդ է տալիս «կախաղան հանել Ուրսուլային» ԱՄՆ-ի հետ գործարքից հետո

ԱՄՆ նախագահ Դոնալդ Թրամփի և Եվրամիության միջև առևտրային համաձայնագրի կնքումից հետո, սովորական եվրոպացիները պետք է «գրոհեն» Բրյուսելը և «կախեն խելագար ծեր տատիկ Ուրսուլային»։ Այս մասին տելեգրամի իր ալիքում հայտարարել է Ռուսաստանի Անվտանգության խորհրդի փոխնախագահ Դմիտրի Մեդվեդևը։

Քաղաքական գործիչը նշել է, որ այս համաձայնագիրը միայն ԱՄՆ-ի համար է օգտակար և նվաստացուցիչ՝ եվրոպացիների համար, քանի որ այն վերացնում է ԵՄ շուկայի պաշտպանությունը՝ զրոյացնելով ամերիկյան ապրանքների վրա մաքսատուրքերը։ Բացի այդ, ֆոն դեր Լեյենի և Թրամփի միջև համաձայնագիրը, ինչպես նշել է Մեդվեդևը, վերահասցեագրում է Եվրոպայից ԱՄՆ ներդրումների հզոր հոսքը և ստեղծում է լրացուցիչ ծախսեր թանկ ամերիկյան էներգիայի համար ԵՄ շատ երկրներում։

Եզրափակելով՝ Մեդվեդևն ասել է, որ այժմ միայն կարելի է համակրել եվրոպացիներին։ Նա խորհուրդ է տվել նրանց պատժել բոլոր եվրոպացի հանձնակատարներին, այդ թվում՝ ֆոն դեր Լեյենին, ովքեր մասնակցել են այս համաձայնագրի կնքմանը։

Հիշեցնենք՝ հուլիսի 28-ին ԱՄՆ-ն և ԵՄ-ն ստորագրեցին առևտրային համաձայնագիր, որի համաձայն Բրյուսելը համաձայնվեց գնել 750 միլիարդ դոլարի ամերիկյան էներգետիկ ռեսուրսներ, ինչպես նաև ավելացնել ներդրումները 600 միլիարդ դոլարով և գնել ամերիկյան զենք: Դրա դիմաց Վաշինգտոնը համաձայնվեց եվրոպական ապրանքների վրա սահմանել 15% մաքսատուրք՝ 30%-ի փոխարեն: