Ես շատ հիասթափված եմ Պուտինից և պատրաստվում եմ կրճատել այդ 50 օրը

ԱՄՆ նախագահ Դոնալդ Թրամփը հայտարարել է, որ մտադիր է կրճատել Ուկրաինայում հրադադարի համաձայնագրի հասնելու համար նախկինում սահմանված 50-օրյա ժամկետը։

«Ես այդ 50 օրը կրճատելու եմ, քանի որ կարծում եմ, որ արդեն գիտեմ պատասխանը և թե ինչ է լինելու», - Շոտլանդիայում լրագրողներին ասել է Թրամփը Մեծ Բրիտանիայի վարչապետ Սթարմերի հետ հանդիպումից առաջ։

Հիշեցնենք` ԱՄՆ նախագահ Դոնալդ Թրամփը հայտարարել էր՝ եթե Ռուսաստանը 50 օրվա ընթացքում Ուկրաինայում պատերազմը դադարեցնելու համաձայնության չհասնի, ապա Վաշինգտոնը Մոսկվայի և նրա առևտրային գործընկերների նկատմամբ «շատ խիստ» մաքսատուրքեր կսահմանի: Սպիտակ տան Օվալաձև սենյակում ՆԱՏՕ-ի գլխավոր քարտուղար Մարկ Ռյուտեի հետ հանդիպմանը ԱՄՆ նախագահը հստակեցրել էր՝ ընդհուպ 100 տոկոս մաքսյին դրույքաչափ: