Թրամփը որոշել է ԱՄՆ-ն դուրս բերել ՅՈՒՆԵՍԿՕ-ից
ԱՄՆ նախագահ Դոնալդ Թրամփը դուրս է բերում երկիրը Միավորված ազգերի կրթության, գիտության և մշակույթի կազմակերպությունից (ՅՈՒՆԵՍԿՕ): Այս մասին հաղորդում է The New York Post (NYP)-ը։
Նշվում է, որ որոշումը կայացվել է կազմակերպության «հակաիսրայելական և հակաամերիկյան» տրամադրությունների հիման վրա: Ինչպես NYP-ին հայտնել է Սպիտակ տան խոսնակը, վերանայում անցկացնելուց հետո վարչակազմի պաշտոնյաները անհամաձայնություն են հայտնել ՅՈՒՆԵՍԿՕ-ի բազմազանության, հավասարության և ներառման քաղաքականության, ինչպես նաև դրա պաղեստինամետ և չինական կողմնակալության հետ։
«Նախագահ Թրամփը որոշել է դուրս բերել Միացյալ Նահանգները ՅՈՒՆԵՍԿՕ-ից, որը աջակցում է բաժանարար, մշակութային և սոցիալական հարցերին, որոնք լիովին հակասում են առողջ բանականությանը և այն քաղաքականությանը, որի համար ամերիկացիները քվեարկել են նոյեմբերին», - ասել է Սպիտակ տան մամուլի քարտուղարի տեղակալ Աննա Քելլին։
Թրամփի վարչակազմը որպես կազմակերպության թերություններ նշել է ՅՈՒՆԵՍԿՕ-ի կողմից «Ռասիզմի դեմ պայքարի գործիքակազմի» հրապարակումը՝ կոչ անելով անդամ պետություններին ընդունել «հակառասիստական» քաղաքականություն և մասնակցել «սոցիալական արդարության առաջատար պաշտպաններ դառնալու համար մրցավազքի», ինչպես նաև 2024 թվականի «Մարդիկ վերափոխող» նախաձեռնությունը։
Սպիտակ տան պաշտոնյայի խոսքով՝ ՅՈՒՆԵՍԿՕ-ն իր Գործադիր խորհրդի միջոցով «իրականացրել է Իսրայելի և հրեական պետության դեմ ուղղված գործողություններ, այդ թվում՝ հրեական սրբավայրերը «Պաղեստինի համաշխարհային ժառանգության վայրեր» հռչակելու համար»։
