Անկարան դա կհամարի իր ազգային անվտանգությանը սպառնացող վտանգ․ Հաքան Ֆիդան

«Իսրայելը քաղաքականություն է որդեգրել, որն ուղղված է տարածաշրջանը թուլացնելուն և այն քաոսի մեջ պահելուն», - ասել է Թուրքիայի արտգործնախարար Հաքան Ֆիդանը, պնդելով, թե եթե շարունակվեն քայլերն այդ ուղղությամբ, Անկարան կմիջամտի։

Եթե Սիրիայում խմբավորումները շարժվեն դեպի բաժանում և անկայունացում, Անկարան դա կհամարի իր ազգային անվտանգությանը սպառնացող վտանգ և կմիջամտի, հայտարարել է  Հաքան Ֆիդանը։

Զգուշացումը հնչել է Սիրիայի Սուվեյդա քաղաքում անցած շաբաթ սրված բախումներից հետո, որոնց թիրախում էր հայտնվել տեղի դրուզ փոքրամասնությունը։ Նրանց պաշտպանելու համար Իսրայելը կրակ էր բացել Սիրիայի ուղղությամբ՝ հարվածելով նաև Դամասկոսում գտնվող պաշտպանության նախարարությանն ու նախագահական նստավայրին։