Կարևոր է՝ որ երկրներն են մեզ հետ, ուկրաինացիները կստանան բազմակի քաղաքացիություն. Զելենսկի
Ուկրաինան նախևառաջ բազմակի քաղաքացիության շուրջ բանակցություններ կվարի այն երկրների հետ, որտեղ ապրում են մեծ թվով ուկրաինացիներ։ Այս մասին հաղորդում է RBC-Ukraine- ն՝ հղում անելով Ուկրաինայի նախագահ Վլադիմիր Զելենսկու ելույթին։
«Մենք աստիճանաբար կորոշենք այն երկրների շրջանակը, որոնց հետ կմշակվեն համապատասխան ընթացակարգերը։ Ես մտածեցի սկսել այն երկրներից, որտեղ այժմ ապրում են մեծ թվով ուկրաինացիներ։ Դրանք, առաջին հերթին, այնպիսի երկրներ են, ինչպիսիք են Գերմանիան, Լեհաստանը, Չեխիան, Բալթյան երկրները», - ասել է Զելենսկին։
Նա հավելել է, նաև, որ նախատեսում են բազմակի քաղաքացիության շուրջ բանակցություններ վարել Կանադայի և այլ երկրների հետ, որտեղ շատ ուկրաինացիներ կան և որտեղ Ուկրաինային մեծ աջակցություն է ցուցաբերվում։
«Սա նույնպես կարևոր ասպեկտ է՝ որ երկրներն են մեզ հետ, որ երկրներն են, որ աջակցում են մեզ և ջերմ են վերաբերվում ուկրաինացիներին, դա շատ կարևոր է Ուկրաինայի համար», - մանրամասնել է նա։
Հիշեցնենք՝ Ուկրաինայի Գերագույն ռադան ընդունել էր օրենք, որը թույլ է տալիս Ուկրաինայում բազմակի քաղաքացիություն ունենալ:
