Ռյուտեն սպառնում է Ռուսաստանի հետ համագործակցող պետություններին
ՆԱՏՕ-ի գլխավոր քարտուղար Մարկ Ռյուտեն հայտարարել է, որ Հնդկաստանը, Բրազիլիան և Չինաստանը կարող են երկրորդական պատժամիջոցների ենթարկվել, եթե շարունակեն համագործակցել Ռուսաստանի հետ։ Այս մասին հաղորդում է Reuters-ը։
«Խնդրում եմ զանգահարեք Վլադիմիր Պուտինին և ասեք նրան, որ նա պետք է լուրջ վերաբերվի Ուկրաինայի շուրջ բանակցություններին, քանի որ հակառակ դեպքում դա մեծ ազդեցություն կունենա Բրազիլիայի, Հնդկաստանի և Չինաստանի վրա», - մեկնաբանել է քաղաքական գործիչը Կոնգրեսում սենատորների հետ հանդիպման ժամանակ։
Ռյուտեն նաև ընդգծել է, որ Եվրոպան ի վիճակի է գտնել միջոցներ՝ ապահովելու համար, որ Ուկրաինան ունենա «լավագույն դիրքը» բանակցություններում։
Հավելենք՝ ավելի վաղ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները մոտ 100% ներմուծման մաքսատուրքեր կսահմանի Ռուսաստանի և նրա առևտրային գործընկերների վրա, եթե Մոսկվան և Վաշինգտոնը 50 օրվա ընթացքում համաձայնության չգան Ուկրաինայի հակամարտությունը կարգավորելու համար։
