Բագրատ սրբազանի ձայնագրությունները մոնտաժված չեն. ՔԿ-ն հայտարարություն է արել
ՔԿ մամուլի խոսնակ Կիմա Ավդալյանը ֆեյսբուքյան իր էջում գրել է, որ Քննչական կոմիտեն հերքում է այսօր լրատվամիջոցներում տարածված տեղեկատվությունը, թե Բագրատ սրբազանի մեղադրանքում ներկայացված խոսակցության մի կտորը մոնտաժված ու կտրված է համատեքստից։
Քննչական կոմիտեն պահանջում է նաև լուրի սկզբնաղբյուր հանդիսացող «Հրապարակ» թերթին տպագրել հերքում։
«Պաշտոնապես պարզաբանում ենք, որ արձանագրված զրույցի մեջ թմրամիջոցների կամ դրանք տարածող անձանց մասին խոսակցություն ընդհանրապես չկա»,– ասվում է հաղորդագրությունում։
Հիշեցնենք` «Հրապարակ» օրաթերթն այսօր առավոտյան՝ ժամը 08:15-ին տարածած հրապարակման մեջ պնդել է, թե իբր «պատերի տակ գյուլլելու» վերաբերյալ Վազգեն Գալստանյանի զրույցը վերաբերում է թմամիջոց իրացնողներին: Գրել էր, թե ամբոջական ձայնագրությունում հստակ լսվում է, որ խոսք է գնում թմրամոլների, թմրանյութեր վաճառողների` «բառիգների» մասին, որոնք մեր ազգը ոչնչացնում են, և սրբազանը նրանց մասին է ասում` «պատի տակ գյուլենք, իրենց ընտանիքներն էլ ուրախ կլինեն»:
Ավելի վաղ հայտնել էինք Բագրատ սրբազանը դատարանում խոստովանել է՝ ձայնագրությունները իրական են:
