Երկար ընդմիջումից հետո Պուտինը և Մակրոնը հեռախոսազրույց են ունեցել
Տևական ընդմիջումից հետո հեռախոսազրույց են ունեցել Ֆրանսիայի և ՌԴ նախագահներ Էմանուել Մակրոնը և Վլադիմիր Պուտինը։ Պետությունների ղեկավարները մանրամասն քննարկել են Մերձավոր Արևելքում ստեղծված իրավիճակը՝ իրանա-իսրայելական դիմակայության և իրանական միջուկային օբյեկտներին ամերիկյան հարվածների համատեքստում։ Այս մասին տեղեկացնում է Կրեմլի մամուլի ծառայությունը։
Վլադիմիր Պուտինը և Էմանուել Մակրոնը նշել են Ռուսաստանի և Ֆրանսիայի՝ որպես ՄԱԿ-ի Անվտանգության խորհրդի մշտական անդամների, հատուկ պատասխանատվությունը խաղաղության և անվտանգության պահպանման գործում, այդ թվում՝ Մերձավոր Արևելքում, ինչպես նաև միջուկային զենքի չտարածման համաշխարհային ռեժիմի պահպանման գործում։ Այս առումով ընդգծվել է Թեհրանի՝ խաղաղ միջուկային էներգիա զարգացնելու օրինական իրավունքը հարգելու և միջուկային զենքի չտարածման մասին պայմանագրով ստանձնած պարտավորությունները շարունակելու, այդ թվում՝ Ատոմային էներգիայի միջազգային գործակալության հետ համագործակցության կարևորությունը։
Առաջնորդները հանդես են եկել Իրանի միջուկային ծրագրի շուրջ ճգնաժամը, ինչպես նաև Մերձավոր Արևելքում առկա այլ հակասությունները լուծելու օգտին՝ բացառապես քաղաքական և դիվանագիտական միջոցներով։ Պայմանավորվածություն է ձեռք բերվել շարունակել շփումները՝ դիրքորոշումների հնարավոր համաձայնեցման նպատակով։
Ուկրաինայի շուրջ ստեղծված իրավիճակը քննարկելիս Վլադիմիր Պուտինը հիշեցրել է, որ ուկրաինական հակամարտությունը արևմտյան պետությունների քաղաքականության ուղղակի հետևանք է, որոնք տարիներ շարունակ անտեսել են Ռուսաստանի անվտանգության շահերը, ստեղծել հակառուսական կամուրջ Ուկրաինայում, հանդուրժել ռուսախոս բնակիչների իրավունքների խախտումները և այժմ վարում են ռազմական գործողությունները երկարաձգելու քաղաքականություն՝ Կիևի ռեժիմը սնելով տարբեր ժամանակակից զենքերով։
Խաղաղ կարգավորման հեռանկարների մասին խոսելով՝ Ռուսաստանի նախագահը հաստատել է հնարավոր համաձայնագրերի հիմնարար մոտեցումները, որոնք պետք է լինեն համապարփակ և երկարաժամկետ, նախատեսեն ուկրաինական ճգնաժամի արմատական պատճառների վերացումը և հիմնված լինեն նոր տարածքային իրողությունների վրա։ Վլադիմիր Պուտինի և Էմանուել Մակրոնի զրույցը բովանդակալից էր։
