Կիևին չօգնող Ռուսաստանի գործընկերներին ԱՄՆ-ում սպասում են 500% մաքսատուրքեր

Ռուսաստանի առևտրային գործընկերներին, որոնք աջակցություն չեն ցուցաբերում Ուկրաինային, սպասում են ԱՄՆ-ի կողմից 500% մաքսատուրքի, այսօր հայտարարել է Ամերիկացի հանրապետական սենատոր Լինդսի Գրեհեմը:

«Ինչ է անում այս օրինագիծը։ Եթե դուք ապրանքներ եք գնում Ռուսաստանից և չեք օգնում Ուկրաինային, ապա ձեր արտադրանքի վրա 500 տոկոս մաքսատուրք է դրվում», - ասել է նա ABC News հեռուստաալիքին տված հարցազրույցում՝ մեկնաբանելով Ռուսաստանի դեմ նոր պատժամիջոցների մասին օրինագծի ընդունման պլանները։ Գրեհեմը նշել է, որ օրինագիծն առաջին հերթին ուղղված է Հնդկաստանի և Չինաստանի դեմ, որոնք, նրա գնահատմամբ, ռուսական նավթ ներմուծողներ են:

«Իմ օրինագիծն ունի 84 սենատորների հավանությունը, որոնք պաշտպանել են փաստաթուղթը մինչեւ այն քվեարկության դնելը: Նա թույլ կտա նախագահին մաքսատուրքեր սահմանել Չինաստանի, Հնդկաստանի և այլ երկրների համար», - ընդգծել է Գրեհեմը։

Ամերիկացի սենատոր Լինդսի Գրեհեմը, որը հայտնի է իր հակառուսական հռետորաբանությամբ, ավելի վաղ պատժամիջոցների օրինագիծ էր ներկայացրել, որը նախատեսում է ԱՄՆ-ի կողմից 500 տոկոսի չափով ներմուծման մաքսատուրքեր սահմանել այն երկրներից ներմուծվող ապրանքների համար, որոնք Ռուսաստանից նավթ, նավթամթերք, բնական գազ եւ ուրան են գնում:

Ավելի ուշ «Բլումբերգ» գործակալությունը հաղորդել էր, որ սենատորները պատրաստ չեն օրինագիծն ընդունել առանց նախագահ Դոնալդ Թրամփի հավանության, իսկ Եվրահանձնաժողովի ղեկավարը Գրեհեմին հայտարարել Է ՌԴ-ի դեմ պատժամիջոցների համակարգված կիրառման անհրաժեշտության մասին: