Դա չի նշանակում, որ պատերազմը կշարունակվի այդքան տարի. Զելենսկի

Ուկրաինայի նախագահ Վլադիմիր Զելենսկին հայտարարել է, որ կա ծրագիր՝ Կիևին առաջիկա երեք տարիների ընթացքում գերմանական IRIS-T հակաօդային պաշտպանության համակարգեր մատակարարելու համար, հաղորդում է ուկրաինական Strana.ua հրատարակությունը։

«Մենք շնորհակալ ենք IRIS-T հակաօդային պաշտպանության համակարգերի մատակարարման համար, հիմա հասկանում ենք մատակարարման ծրագիրը։ Ես մանրամասների մեջ չեմ խորանա, բայց սա առաջիկա երեք տարիների ծրագիր է, և սա մեզ համար շատ կարևոր աջակցություն է ամեն դեպքում», - ասել է Ուկրաինայի առաջնորդը Գերմանիայի պաշտպանության նախարար Բորիս Պիստորիուսի հետ համատեղ մամուլի ասուլիսում։

Զելենսկին նշել է, որ դա չի նշանակում, որ ռազմական գործողությունները կշարունակվեն այդքան տարի։ Սակայն Ուկրաինային, նախագահի խոսքով, դեռևս անհրաժեշտ են բարձրորակ հակաօդային պաշտպանության համակարգեր՝ պաշտպանության համար։