Վստահաբար Երևանում որոշակի հավելյալ խցանումներ ավելանալու են. Ավինյան

«Երևան քաղաքում հավելյալ 250 ավտոբուսները ներմուծելու ժամանակ վստահաբար որոշակի հավելյալ խցանումներ ավելանալու են: Ոչ միայն այս պատճառով են ավելանալու, այլև խցանումներն ավելանալու են հենց այն պահին, երբ շուտով սկսենք գծել նոր ավտոբուսային գծերը տարբեր հատվածներում, որոնք նախատեսված են միայն ավտոբուսների համար»,-այս մասին Ազգային ժողովում 2024-ի պետբյուջեի կատարողականի նախնական քննարկումների ժամանակ ասաց Երևանի քաղաքապետ Տիգրան Ավինյանը:

«Այո՛, պետք է այդ խցանումներն առաջանան, պետք է մեր տրանսպորտային համակարգն իր ամբողջական շարժակազմով ծառայի ամբողջ քաղաքին: Մեր ժամանակը պետք է քիչ ծախսվի ավտոբուս սպասելու վրա, որ ես, դուք, մեր գործընկերները որոշենք, որ մեզ ավտոմեքենա հազվագյուտ դեպքերում է պետք: Երևան քաղաքում տրանսպորտային համակարգն այնպիսին է, որ բոլորիս ավելի հարմար է, որ ոչ թե գնանք, այդ խցանումների մեջ մեր ավտոյով մնանք, այլ մտնենք ավտոբուս, նստենք մետրոն, նստենք մյուսը և այդ ճանապարհով տեղաշարժվենք քաղաքով մեկ»,-ասել է նա:

Նա  վստահեցրել է` չկա մի եվրոպական քաղաքի հաջողված փորձ, որն այս ճանապարհով չի գնացել: Բոլորը, ովքեր գնացել են այս ճանապարհով, հաջողել են: Բոլոր նրանք, ովքեր հապաղել են այս ճանապարհով գնալ, նրանք իրականում շատ ավելի լուրջ խնդիրների առաջ են կանգնած: